ساعد طفلك ضد الأزمات المالية

مو في العادة بنقرأ عن الأطفال والأزمات المالية في نفس المقال. فكيف ممكن نناقش مع أطفال صغار موضوع كبير مثل الإدارة المالية؟ هل هذا بيكون ثقيل على أعمارهم وطفولتهم؟ وكيف نبدأ؟
في وقت أنه هذه الأسئلة بتحيرنا إلا أنه الأزمة المالية اللي يعانيها العالم اليوم ممكن تجيبلنا الكثير من الإجابات المفيدة، أوّلها الوعي اللي صار عند أطفالنا في موضوع التراجع الاقتصادي. هم عاشو بعض علاماته مثل توقّف حضورهم للمدرسة وعدم الخروج من البيت. وممكن يكون اللي جالس يصير الآن لقاح وقائي لهم ضد أي أزمات مالية في المستقبل على المستوى الفردي أو الجماعي العالمي.
كيف نستغلّ هذه الظروف عشان نساعد أطفالنا ضد الأزمات المالية؟
1) ابدأ بالحديث عن الأزمة الحالية
هي خطوة ضرورية جداً لأنك إذا ما سويتها راح يسمعوا عنها لا من كلامهم مع أصحابهم أو كلامك مع الناس أو ممكن وقت ما تشوف الأخبار وتظنّ أنهم مشغولين في اللعب. إذا حصل هذا بدون ما تكون كلمتهم بشكل شخصي عن الأزمة، ممكن يدخل القلق والخوف لقلوبهم، ويحسوا بالوحدة لأنه ما في شخص كبير يثقو فيه جالس يشرح اللي يصير وينور قدامهم المجهول.
تطبيق مساعد: ممكن تحمل لعبة Star Banks Adventure، اللي راح تعلّم الأطفال أسس التخطيط المالي عن طريق ادخار المال عشان يبنوا المسلتزمات الفضائية وينقذوا كوكب بولاريا من الأزمة المالية.
2) علّمهم أهمية التوفير
من إغلاق الأنوار لما يخلصوا منها لاستخدام بعض الاستراتيجيات الاقتصادية وقت التسوق، فيه أمور كثيرة يتعلّمها الأطفال في التوفير. إذا كان عمر طفلك 10 سنوات أو أكثر، ممكن تعطيه مهمة التسوّق لقائمة بسيطة من الأغراض لكن بمبلغ تحدده من قبل وما مداه يعديه. يفيد هذا التحدي في تطوير مهارات التخطيط والتحليل والمقارنة عند الأطفال ويستفيدو منه في أمور حياتهم المختلفة.
تطبيق مساعد: ممكن تحمل لعبة Renegade Buggies. فكرتها هي تجميع الأطفال للفكّات والكوبونات والأموال وقت ما يتحرّكو بعربة التسوق عشان يقدروا يشتروا أكبر قيمة بأقل كلفة.
3) ضع الادخار شرطاً لمشترياتهم
الأهل بطبيعتهم يندفعو في تدليل أطفالهم ومكافأتهم بالهدايا، لكنّ فعل هذا باستمرار راح يعمل تأثير سلبي على المدى الطويل، ويتعود الطفل على كل ما يبغاه دون جهد، بالعلم أنه طلباتهم بتزيد سنة ورا سنة. عشان تتفادى هذا الشيء، ممكن تعتمد على مبدأ المدخول الأسبوعي أو الشهري، بحيث يكون طفلك هو المسؤول المباشر عن تنظيم ميزانيته والادخار لكل مشترياته خارج الاحتياجات الأساسية اللي تهتم بها.
تطبيق مساعد: ممكن تحمل لعبة Savings Spree، اللي تعلّم الأطفال أهمية المبالغ الصغيرة في إنفاق أو ادخار مبالغ أكبر، وتساعدهم في تحديد خياراتهم حسب أولوياتهم.
4) ناقش الإعلانات مع أولادك
من المهم أنك توعي أطفالك عن تأثير الإعلانات، اليوم بتكون موجودة في كل الشاشات وبرامج الألعاب حتى المصمّمة للأطفال لعمر أقل من 5 سنوات. مع إمكانية حظرالإعلانات بشكل نهائي في بعض الأحيان، لكن هذا ما يلغي ضرورة مناقشتها لحماية طفلك من تأثير التسوّق العاطفي ومن ضغط الأصدقاء اللي هم وجه ثاني للإعلانات و تأثير بعض المشاهير والشخصيات الكرتونية اللي تستخدمها الشركات في الترويج لمنتجاتها.
تطبيق مساعد: بعد شرح مبدأ الإعلانات لطفلك، حاولوا أنكم تسووا إعلان عشان كل واحد يقنع الثاني أنه يشتري منتج محدد. وبكدا يتنبّه الأطفال لأسلوب الإعلانات خصوصا إذا نجحت في تغيير رأيهم بدرجة ملحوظة.
5) كن قدوة مثالية لهم
أخيراً وليس آخراً خليك أنت مدرسة لهم، بسلوكك، بقراراتك وخياراتك والأهم بمحادثاتك معهم لأنها راح تفتح الفرصة للأسئلة ومناقشة اهتماماتهم المالية عشان تتمكن وقتها من توجيهها بالمسار الصحيح. حسب الجمعية الأمريكية لعلم النفس، يكون الأهل مصدر العادات الإيجابية المرتبطة بالإدارة المالية عند 80% من الأطفال. عشان كدا خليك صديق لأطفالك. واقضِ معاهم وقت كافي والعب معهم. فكل هذا ممكن يضاعف تأثيرك عليهم.
تطبيق مساعد: حاول تخلي أطفالك جزء من نشاطاتك اللي تسويها مهما كانت بسيطة، مثل كتابة المصاريف ، دفع الفواتير أو تحضير قائمة المشتريات اللي يحتاجها البيت، إلخ.
باتباعك للنصائح الماضية في هذا المقال، راح يتعلّم الأطفال أسس الإدارة المالية السليمة ويتدرّبو عليها ويشعرو بفرح المسؤولية وأخيراً يصيروا أصحاب وعي وخبرة ضد الأزمات المالية.