مع حلول شهر رمضان المبارك، كل عام تتوجه بالتأكيد إلى المجمعات التجارية والمتاجر الكبرى يبغالك تجمع مقاضي الشهر الكريم من اللحوم والعصائر والحلا والمنتجات الغذائية بمختلف أشكالها وأنواعها، واللي بتستخدمها في تحضير وجبتين الفطور والسحور طوال الشهر، وعشان تنجح في التسوق الذكي لمقاضيك جمّعنالك بعض النصائح اللي ممكن تساعدك في تسوق مقاضيك وأغراضك بسهولة ويجيلك التوفيق فيها إن شاء الله.
٦ نصائح تساعدك على تسوق مقاضيك بذكاء في شهر رمضان:
- حدد أولوياتك
قبل خروجك من البيت وتوجهك للسوق لشراء مقاضي البيت، لابد من تحديد الأغراض الضرورية اللي ما راح تقدر تستغنى عنها في تحضير طعام الفطور والسحور، وبعدين تحدد المقاضي اللي راح تقدر تستغنى عنها لما ما تكفي المبالغ المالية في حسابك ولذلك اشتري المقاضي المهمة أولاً. - كتابة قائمة بالمقاضي قبل ذهابك للتسوق
يبغالك قبل الذهاب للسوق اللي راح تتسوق منه تجهز قائمة بالأغراض اللي تبغاها، وأن تتضمن هذه القائمة المقاضي المهمة من المواد الغذائية اللي ما يقدر يستغنى عنها المنزل، مثل السكر، والرز، والمكرونة، والبقوليات، وغيرها من المقاضي الأساسية، وحاول قدر الإمكان الالتزام بقائمة المقاضي المحددة مسبقاً عشان ما ينفك كيسك ويخس عليك قبل نهاية الشهر. - اختيار توقيت التسوق
اسأل نفسك ايش التوقيت المناسب لتسوق مقاضيك، أول شيء لا تحاول النزول للسوق وأنت صائم حتى لا تضطر لشراء كل ما تشتهيه نفسك، وأنت تدري وش بيصير وأنت جوعان! فمعظم الناس اللي يتسوقوا خلال فترة الصيام يشتروا أغراض كثيرة مالها داعي، لذلك لازم تسوّق بعد تناول الفطور، وبطنك شبعانة وأنت متحكم في قائمة مقاضيك. - استغل وقت العروض
يبغالك عند التسوق أن تستغل وقت العروض… كيف تقدر تستغل وقت العروض؟ من خلال الاطلاع على كافة العروض والخصومات اللي تقدمها المتاجر على المنتجات الغذائية، وبعدين تشتري من المتجر اللي عنده العروض الأفضل، فالعروض راح تساعدك على التوفير، صحصح وانتبه وما تخلي العروض المغرية تضحك عليك وانت في غنى عنها! - انتبه لصلاحية المنتجات
ركز وانت بتشتري مقاضيك، تأكد من الصلاحية المكتوبة على المنتجات بالاطلاع على تاريخ الإنتاج والإنتهاء، واشتري من المتجر الي تثق في جودة منتجاته، ولما تختار الأكل الى تبغى تشتريه لازم تتأكد من أن الخضروات، والفاكهة طازجة، ومغلفة بشكل جيد، وأن تكون المنتجات المعلبة باردة محفوظة بثلاجة المحل مثل الألبان، والجبن، واللحوم، وغيرها من المنتجات الى لازم حفظها بالثلاجة فطريقة تخزين المحل للأطعمة إذا كانت خاطئة ممكن تعرض الأطعمة للتلف حتى وإن كانت صلاحيتها سارية. - كن ذكياً في اختيار الأطعمة
كيف تكون ذكي في اختيار الأطعمة؟! التسوق الذكي في شهر رمضان يكون باختيار الأطعمة المهمة اللي يحتاجها الجسم مثل الخضروات، والفاكهة، ومنتجات الألبان، والبيض، واللحوم، والأسماك، والبقوليات، لأن الأطعمة هذه راح تعطي الجسم العناصر الغذائية الى يفقدها خلال فترة الصيام، وصحصح وأنت تختار الزيوت فلازم تختار الزيوت الصحية لطبخ الطعام مثل زيت الزيتون، وزيت الذرة، وعباد الشمس، وعند شراء الألبان أو المعلبات لازم تختار منتجات الشركات المعروفة، وابتعد عن شراء المنتجات مجهولة المصدر والغير موثوق بها، ولا مانع انك تشتري المنتجات من ماركة الهايبر نفسه اذا حصلت عليها.
شهر رمضان شهر صوم، وعبادة، وفي الغالب ما يقدر الصائم انه يتناول كميات كبيرة من الأكل، عشان كدا يفترض تحضير كميات معقولة من الوجبات حتى ما تضطر تصرف مبالغ أكثر، وترمي الفائض من الطعام، وعشان تبعد عن التبذير، حتى لو أقمت مناسبة، وكان فيه طعام متبقي، تقدر تحتفظ فيه ليوم ثاني، أو تتواصل مع الجمعيات الخيرية المعنية بفائض الأطعمة من باب حفظ النعمة.
