أغلب الأزمات المالية ما تجي “في يوم وليلة”، عادةً ما تكون نتيجة لقرارات مالية خاطئة سابقة.
خلينا نتعرف على بعضها :
1) عدم الادخار للتقاعد
لاحظت دراسة أن الناس ممكن توصل لعمر 55 وهي بتأجل قرار الادخار معتقدة أنه لسة عندهم الوقت. لكن إذا تأخرت على عملية الادخار دحين، راح يصعب عليك أنك تبدأ بيها في المستقبل لأنك في كل مرة راح تلاقي سبب جديد عشان ما تدّخر زي وضع السوق المتردّي أو الديون الواجبة عليك أو الحظ الساحر اللي تنتظره عشان يقلب المعايير، بكدا توصل لسن التقاعد بدون أي خطة مالية تعتمد عليها.
2) الاعتماد على البطاقة الائتمانية
ايش هو مفهومك عن البطاقة الائتمانية؟ بتنظر لها كمصدر دخل إضافي؟ أو مخرج مثالي لسداد الفواتير لمن يخلص الراتب ، أو أسلوب عيش فاخر عشان تشتري اللي يعجبك؟ نعم هي أفكار منتشرة لكن خاطئة كمان. إذا كتب تبا تستخدم البطاقة الائتمانية بطريقة ذكية لازم تسدد رصيدها بالكامل في كل شهرعشان ما تترتب عليك الديون وتستفيد من نقاط المكافآت وتحصل مزايا إضافية مجاناً.
3) عدم تخصيص مبلغ للطوارئ
تخيل لو تعطلت سيارتك فجأة وسط الطريق وبعدها اتصلت بك زوجتك عشان تبغى أكل إضافي لضيوف جايين على العشاء، ولما وصلت البيت أخيراً التقيت بولد عمّك وعزمك على فرحه الأسبوع الجاي! أكيد بتزعجك الضغوطات المالية المفاجئة. عشان كدا بيكون جزء من التخطيط المالي في حسبة النفقات اللي ما تعرف عنها لكن لازم تصادفك في مناسبات سارّة أو مزعجة، ومن هنا تجي أهمية تخصيص مبلغ للحالات الطارئة.
4) التغاضي عن الاستثمار
وأنت نايم، مداك تجمع ثروة؟ بالمنطق “لا” لكن هذا اللي يصير بالزبط في مجال الاستثمار. في كل عملية استثمارية أنت راح ترفع قيمة مدخولك وتحصل الأرباح اللي تقربك من تحقيق أحلامك بدون ما تقضي العمر بالمبلغ اللي يحدده راتبك. واليوم بوجود الكثير من المحفزات للاستثمار في المملكة وبظل دعم الرؤية 2030 لرواد الأعمال، راحت الكثير من العقبات وصارت فرصك في النجاح أكبر وأوفر.
5) الإنفاق دون ميزانية شهرية
إذا كان راتبك ينتهي قبل نهاية الشهر على كدا انت ما عندك “ميزانية شهرية.” هل تعرف أهمية الكلمتين اللي فاتوا؟ هي اللي ممكن تحميك من كل القرارات الخاطئة اللي ذكرناها، لأن الخطط المالية بتساعدك على ضبط وإدارة نفقاتك بطريقة سلسة بعيد عن أي قلق أو مخاوف مالية.
