6 قواعد للإدارة المالية يمكن اعتمادها من سن الـ 9

مين فينا ما يحلم بحياة مرفّهة، يحقق فيها ذاته وأحلامه بدون ما يغرق في الديون وبدون ما يأخذ كسب المال جزء كبير من تفكيره على حساب وقته مع اللي يحبهم أو يسوي هواياته؟ حسب دراسة من واحدة من أكبر شركات الاستثمار والصحة المالية في الولايات المتحدة وقالوا فيها أن الأمور المالية السبب الأول للضغوطات، خصوصا للأعمار بين 18 و34، المرحلة اللي تكون فيها الاستقلالية المالية والشخصية من أهم أولويات الفرد بجانب تكوين أسرة جميلة والعناية بيها.
عشان كدا وبمناسبة قربنا من أسبوع المال العالمي، جمعنا لكم أفضل 6 قواعد للإدارة المالية، وممكن تعتمدها من سن الـ 9 سنوات.
1.ابدأ من أصغر سن ممكن
مافي شيء اسمه عمر صغير عشان تبدأ تطور مهاراتك المالية. كل ما بدأت من سن أصغر، كل ما قدرت تأمن الاستقرار المادي إلى أطول وقت. لأنك راح تكتسب العادات المالية الحسنة بشكل مباشر، بدون ما تأخذ العادات الخاطئة في الأول بعدين تجتهد عشان تتخلص منها. فالبداية من سن صغير تعطيك وقت أكبر عشان تختبر أولوياتك وإمكانياتك وسلوكك المادي قبل ما توصل لمرحلة عمرية تكون فيها تحت الأمر الواقع مع ضيق من الوقت عشان تأخذ بعض القرارات المهمة.
2.ادّخر ثم ادّخر
الادخار هو أساس الإدارة المالية السليمة، وينطبق هذا على كافة المراحل العمرية وجميع المستويات المادية. ممكن تبدأ من جمع الفكات النقدية و تنتقل إلى الادخار بدل الأوراق النقدية اللي ترجع إليك مقابل العمليات الشرائية. في كل مرة تأخذ فيها على مصروفك أو مكافأة من والديك أو أحد أفراد الأسرة، اعتمد مبدأ الـ 20 – 30 – 50 اللي يقول أنه قبل ما تصرف 50% على احتياجاتك و30% على الكماليات، ادّخر في الأول20% من كل مبلغ جديد.
3.نظّم نفقاتك
أتذكّر دائماً أنه الوجه الثاني للادخار هو خفض الإنفاق، وهذا ما يتحقق إلا إذا سويت ميزانية ولو بسيطة عشان تنظم مشترياتك. عشان كدا ننصحك بأنك تسجّل الأموال اللي تصرفها بشكل مستمر عشان تقدر تدرس سلوكك الشرائي في الدرجة الأولى وتكون على دراية بكل مصروفاتك. من الأخطاء المنتشرة في الإنفاق هو الشراء غير الواعي أو المدروس، أو الاعتماد على البطاقة الائتمانية مثلاً بدون ما تتأكد من رصيدها، الشيء اللي يكون في الغالب سبب في نهاية مدخولك قبل ما تسدد كل المصاريف.
4.اختر أصدقاءك بحكمة
الدائرة الاجتماعية المحيطة تأثر بشكل كبير على كثير من جوانب حياتك، أهمها الجانب المالي. فنشوف خصوصا عند الأعمار الصغيرة يتأثّر الأفراد بمشتريات أصدقائهم، رغبةً منهم في الاندماج أو التشبّه بطريقة عيش معيّنة. حتى عند الكبار، ممكن يؤثّر أصحابك على الأماكن اللي تروحلها ، والماركات اللي تلبسها والهدايا اللي تنقيها وغيرها الكثير من الخيارات المتعلّقة بحجم مصروفك تحت عنوان ”الصورة الاجتماعية“ مو أكثر. احذر كمان من اللي يستغلوك مادياً بإسم الصداقة، واختر أصدقاءك بحكمة.
5.أطلب المساعدة من الأكثر خبرة
عندما تنطلق بمشروعك للإدارة المالية، ممكن يجي على بالك الكثير من الأسئلة اللي ما تلاقي جواب لها. فاسأل الناس الأكثر خبرة منك مثل أحد أفراد أسرتك أو أقاربك أو أحد المراجع عبر الإنترنت أو ممكن كتاب تقرأه للبحث في موضوع معيّن. هذا ممكن يرفع وعيك المالي ويجهزك عشان تعدي مراحل مالية متطورة أكثر مثل ادخار حساب للطوارئ أو التقاعد أو التخطيط لمشروع جديد أو شراء منزل أو سيارة، وغيرها الكثير مما يناسب أحلامك وأهدافك.
6.اعمل
أفضل طريقة عشان تعرف قيمة الأموال اللي تصرفها هي أنك تجمعها بنفسك. عشان كدا لا تتردد في العمل. حتى لو أنك طالب، ابحث عن وظيفة في أيام العطلة أو اقترح على معارفك أنك تساعدهم في أعمالهم أو مشاريعهم مهما كانت مساهمتك صغيرة. فهذا ممكن أنه يوضحلك أساسيات الحياة المهنية ويكسبك مهارات مهمة لإدارة حياتك مثل التواصل مع الآخرين والالتزام بأوقات محددة وتحمّل المسؤولية، وغيرها من الخبرات اللي تزيد ثقتك بنفسك وبخططك المستقبلية.