التوعية المالية هي أساس التجربة المصرفية الجيدة والإدارة المسؤولة لأموالك. عشان كدا لازم تتعرف فيما يلي عن الفروقات الأساسية اللي تفصل بين أشهر بطاقتين مصرفيتين وهما: البطاقة المسبقة الدفع (debit card) والبطاقة الائتمانية (credit card).
1. آلية العمل
• الـ debit card: ترتبط هذه البطاقة مباشرةً بأموال حسابك الجاري وبالتالي يمديك تصرف منها ما دمت تملك رصيد في هذا الحساب، بشرط ما تتجاوز الحد الشهري اللي تحدّده نوع البطاقة. لكن بعض الأحيان ممكن تصرف أكثر من اللي في رصيدك، عشان كدا احذر لأنه ممكن تدفع رسوم معيّنة.
• الـ credit card: هذه البطاقة مثل ما تكون دين شهري تتقدّم للبنك عشان تأخذه بشرط أنك تستوفي بعض المعايير وتسدّد قيمة الدين في فترة معيّنة من كل شهر، وبكدا يكون حد صرفك ثابت ومحدد برصيد هذه البطاقة. أما إذا ما قدرت تسدد كامل المبلغ اللي صرفته في الوقت المطلوب، بيكون مطلوب منك أنك تدفع فوائد إضافية على قيمة مصروفاتك.
2. الاستعمالات على الصراف الآلي
• الـ debit card: استخدام هذه البطاقة تخليك تتحكّم مجاناً في عمليات حسابك مثل الإيداع والسحب وتعبئة رصيد الجوال وخدمات أخرى. ينطبق هذا على كافة العملات اللي تملكها في الحساب سواء ريال سعودي أو دولار أو غيرها.
• الـ credit card: هذه البطاقة تخليك تودع مجاناً في حساب خاص منفصل عن حسابك الشخصي مثل ما ذكرنا. لكنك إذا سحبت كاش مباشرةً من الصراف الآلي راح تتراكم عليك الفوائد على طول حتى لو سدّدت هذا المبلغ في الوقت المحدد.
3. مكافآت الاستخدام
• الـ debit card: ما تقدّم هذه البطاقة أي مكافآت مباشرة، لكن يكون استعمالها نوع من أنواع المكافأة لخططك المالية اللي ما توقف في وجهها هذه البطاقة لأنها ما تشجعك على الإنفاق على عكس البطاقة الائتمانية، وإدارتها أقل تعب بحيث انك مو لازم تشيك عن رصيدها باستمرار عشان تسدد مستحقاتها في الوقت.
• الـ credit card: مكافآت هذه البطاقة مباشرة ومادية كمان، لأنك راح تكسب باستخدامها نقاط حسب القيمة اللي تدفعها عشان تقدر تستبدلها بمنتجات ثانية يحدّدها البرنامج. هذا غير المكافآت الثانية اللي تعتمد على البنك زي أن تحصل على دخول مجاني لصالة كبار الشخصيات في المطارات الدولية أو تأمين مجاني لسفرك وغيرها من المميزات.
4. القدرة الشرائية
• الـdebit card: مع هذه البطاقة بتكون قدرتك على الشراء محدودة بالمبلغ اللي تملكه لأنها مسبقة الدفع، بكدا عليك انك تخطط لميزانيتك بشكل شهري عشان تقدر تلاقي كل اللي تحتاج له. أما إذا جاتك دفعة مفاجئة مثل تعطّل سيارتك أو حاجتك عشان تشتري شيء مو متوقّع، فما راح تقدّم لك هذه البطاقة أي تسهيلات.
• الـcredit card: في القدرة الشرائية، هذه البطاقة سيف ذو حدّين لأنها بتحط في يديك أموالاً تخليك تشتري كل اللي تحتاج له وتسدد كل مصاريفك الطارئة حتى لو ما كان عندك هذه المبالغ في حسابك الشخصي. لكن في نفس الوقت أنت بتوقع نفسك في الدين اللي ممكن يتراكم عليه الفوائد إذا ما قدرت تسدده في الوقت المطلوب.
باختصار كل البطاقتين عندها مميزات وعيوب. و الشي الأساسي اللي يحدد اختيارك بينها هو حسن إدارتك للبطاقة الائتمانية واستعمالك المناسب للبطاقة مسبقة الدفع. دحين صرت تعرف عن التفاصيل ، ما يمنع أنك تملك الاثنتين معاً وتستفيد منهم لأقصى حد.
