تبغى تعرف كيف تنظم أمورك المالية في شهر رمضان؟ تقدر تتحكم في مصاريفك، وهذا يكون بترتيب احتياجاتك على حسب أهميتها، بعض الناس قبل بداية شهر رمضان يحاول يستعد بتوفير مبلغ يساعده على إنه يغطي مصاريف رمضان اللي تكثر فيه الواجبات والهدايا والعزايم، غير مصاريف الاستعدادات لعيد الفطر، في هذا المقال راح نقدم لكم بعض النصائح المفيدة ، واللي راح تساعدكم على تقليل المصاريف خلال شهر رمضان المبارك.
نصائح تخليك تنظم مصاريفك في رمضان
- تقتصد في العزايم
إذا ما كانت أمورك المادية على ما يرام، فحاول قد ما تقدر تخلي عزيمة أهلك أو أخوياك مرة واحدة أو مرتين بالكثير خلال الشهر عشان ما تخرج الأمور عن السيطرة، ثم تلقى أن مصاريف رمضان زادت عليك، وراتبك ما يكفي، كمان تقدر تقلل عدد المعازيم على الفطور أو السحور وبكدا تكون كميات الأكل اللي راح تقدمه أصغر وبتكلفة أقل. - تسوي الأكل في البيت
في شهر رمضان، تقدر تسوي الأكل والحلويات الرمضانية المشهورة مثل الكنافة، والقطايف في البيت بدل ما تشتريها من برا بأسعار غالية يمكن تكون ضعف تكلفة تجهيزها في البيت، وهذا يساعدك على إنك توفّر فلوسك في شهر رمضان. - توفر وتسدد ديونك
بعض الناس يجهزوا نفسهم قبل رمضان لتسديد الديون اللي عليهم، وحتى لو ما عليهم ديون، تلقاهم يتجهزوا لمصاريف رمضان من عزايم وغيرها، عشان كدا لازم تحدد أولوياتك من ديون، ومصروفات في رمضان، وتحاول قد ما تقدر توفر مبلغ يعينك على تسديد ديونك، ويخليك تقدر تسيطر على وضعك المادي في هالفترة. - تجهز زكاة الفطر
زكاة الفطر نوع من أنواع الزكاة اللي يجب على كل مسلم أن يخرجها عنه، وعن أفراد أسرته قبل صلاة عيد الفطر، وهي مكتوبة على كل فرد مسلم سواء كان صغير أو كبير، لازم يكون رب الأسرة موفر مبلغ خاص بالزكاة ويخليه في صندوق أو حساب خاص عشان يكون قادر بإذن الله إنه يخرجها في وقتها. - تخطط لمصاريف العيد
معروف إنه في أواخر رمضان تبدأ كل أسرة تشتري اللي يلزمها، ويلزم أطفالها من ملابس، وأحذية، وحلويات للعيد، من المهم انك تعمل حسابك على توفير المبلغ اللي يكفي لمصاريف والتزامات عيد الفطر، اللي يدخل فيها كل شي تحتاجه العائلة، ومصاريف الطلعات والتمشيات وغيرها.
